Gen atis ki chante pou pase tan. Gen lòt ki chante pou fè lajan. Men gen atis ki chante paske yo pa ka fè silans devan reyalite sosyete yo ap viv. Blaze One se youn nan dènye kategori a.
Listwa mizik ayisyèn nan pa janm manke talan. Sa ki toujou manke, se kouraj pou rekonèt yo. Ant bri, piblisite, estrateji mache ak jwèt enfliyans, anpil vwa reyèl pèdi nan silans. Blaze One se youn nan vwa sa yo: prezan, konsistan, angaje, men sistematikman yo mete sou kote.
Pale de Blaze One jodi a se pa fè yon jès emosyonèl. Se poze yon kesyon serye sou direksyon mizik ayisyèn nan, sou wòl medya yo, sou fason nou chwazi mete limyè sou kèk atis pandan nou kite lòt yo kache dèyè sèn nan malgre pwofondè ak onètete travay yo.
Blaze One pa yon atis loray kale. Li pa yon aksidan. Li se rezilta yon chwa, chwa pou pa fè mizik kòm distraksyon, mizik vid, men kòm zak temwayaj. Pawòl li yo pa fèt pou danse konsyans, men pou reveye li. Se poutèt sa li pa konfòtab, li pa fasil pou vann, li pa toujou jwenn mikwo, li pa toujou jwenn sosyete ap onore li. Malgre sa, plim li kontinye ap ekri listwa, vwa li pa sispann chante espwa pou yon demen miyò e sekwe nou nan koma nou ye a.
Nan yon epòk kote anpil atis ayisyen ap chache adapte tèt yo ak tandans ekstèn, lage yo nan tout sa ki fasil, chante sèlman sou seksyalite, sou tematik ki pa reflete kondisyon sanblab nou ap viv yo, Blaze One rete anrasinen nan pote vwa sa ki fèb yo. Li pa imite. Li pa kopye. Li pa chache apwobasyon algoritm ni validasyon platfòm. Li pale ak pèp li, nan lang li, ak doulè li, ak kesyon li yo. Sa fè li vin yon atis ki mande efò pou tande. E jodi a, efò pa alamòd.
Nan yon “endistri” mizik ayisyèn kote anpil moun prefere imite olye yo inove, kote bri souvan kouvri sans, kote imaj souvan pi enpòtan pase mesaj, Blaze One chwazi chemen ki pi difisil la : rete fidèl ak konsyans li. Blaze One pa yon non ki tounen refren nan bouch animatè radyo yo, li pa yon figi medya ap prezante maten, midi, aswè. Men li se yon vwa : yon vwa ki soti fon nan trip sosyete a, yon vwa ki pa kache, yon vwa ki pa pran poz, yon vwa ki pa mande pèmisyon pou li di laverite.
Souvan, kèk ayisyen ap mande tèt yo : poukisa Blaze One pa p woule tout kote nan peyi a ? Poukisa Blaze One pa envite sou tout platfòm k ap pale mizik ?
Poze kesyon sa a yo se fè sanblan nou pa konnen reyalite medya an Ayiti. Repons la senp kou dlo kòk : medya yo ap travay pou kontinye dekonstwi sosyete a. Yo pa gen ajanda pou gide popilasyon an sou yon bon chimen. Ou ka konte sou dwèt ou konbyen medya ki pa p vann debòch, imoralite ak salte andan sosyete ayisyèn nan. Se poutèt sa, pwomote yon atis tankou Blaze One se ale kont enterè yo paske yo pa t janm gen misyon pou kontribye nan bati yon pi bon sosyete pou tout moun viv byen ladan.
Si gen yon bagay ou ta dwe konnen, mizik pa janm inosan. Li fòme imajinè. Li modle langaj. Li konstwi referans. Li kontribye nan kenbe tradisyon nou vivan. Li ede nan fè nou konpran tèt nou, sa vle di, sa nou ye, sa nou reprezante e kisa nou ka kontinye fè ansanm pou grandè ak pwosperite peyi nou. Li fè sans, lè yon atis tankou Blaze One pa gen plas li merite andan sosyete a. Paske gen yon sistèm ki programe nou pou fè nou jete byen lwen sa ki fè pati de nou menm, sa ki ka ede nou konprann eta nou e kòman nou gen pouvwa pou chanje reyalite n ap fè fas yo. Se poutèt sa, lè nou fè silans sou atis tankou Blaze One, nou pa sèlman inyore yon moun, nou diminye wòl mizik la andan sosyete nou an.
Si gen yon bagay enpòtan pou nou pa janm bliye, Blaze One fè pati tradisyon atis ayisyen ki konprann mizik kòm responsablite moral. Nan liy sa a, atis la pa senpleman yon animatè foul. Li se yon temwen epòk li. Yon vwa ki pale lè lòt yo pè. Yon konsyans ki raple ke atizay pa dwe pèdi sans li. Se pou rezon sa a, li pa bezwen fo piblisite pou egziste. Travay li deja la. Travay li pale pou li. Li reziste. Li kontinye. E se sa ki pi enpòtan.
Blaze One se flanm dife nan mitan sann. Li se vwa ki leve lè mikwo yo etenn. Li se pwezi ki mache pye atè nan labou reyalite a pou dekri sa moun ki pi matirize nan sosyete a ap viv. Pandan anpil medya ap chwazi repete menm non yo, pandan yo kontinye ap fabrike “vedèt” olye yo revele talan. Blaze One kontinye fè sa atis dwe fè: temwaye epòk li.
Depi nan Remèd fèy yo rive jouk nan devwa sivik, pase nan Federal pou rive nan Panse pou pèp, Blaze One pa chante Ayiti kòm yon kat postal, li chante Ayiti jan li ye a : blese, men vivan. Fatige, men kanpe. Twompe, men toujou ap chache verite. Nan pawòl li, gen kòlè, gen tristès, men gen espwa.
Si gen yon bagay istwa mizik ayisyèn lan deja montre nou, se pa toujou atis medya yo pouse ki make jenerasyon yo. Souvan, se sa yo inyore yo ki ekri verite a pi klè. Jodi a, pale de Blaze One, se pa fè piblisite, se fè jistis. Se raple ke mizik ayisyèn nan pa dwe tounen yon espas vid, san memwa, san konsyans, san rasin. Se raple ke gen atis ki chwazi chemen difisil la paske yo renmen pèp yo plis pase aplodisman. Men kòm sosyete, kòm medya, kòm konsomatè kilti, nou gen yon devwa : pa kite silans nou konplis nan toufe vwa k ap chante reyalite nou. Mete limyè sou Blaze One, se pa fè favè. Se rekonèt merit li genyen. Se bay mizik ayisyèn nan respè li merite.
Nou swete Blaze One kontinye ekri pou listwa, menm si listwa pa toujou prese louvri pòt li. Nou swete li kontinye chwazi pawòl ki lou olye pawòl ki fasil. Nou swete li kontinye rete fidèl ak rasin li, ak pèp li, ak verite li. Paske atis ki ekri pou listwa pa bezwen anpil espas pou li layite. Tan toujou fini pa tande yo e onore yo. E lè jou a rive, Blaze One ap deja la, pa kòm yon bri ki pase, men kòm yon vwa ki rete.
Blaze One se yon flanm ki pa mande pèmisyon pou limen. Se pou rezon sa a, pawòl li gen memwa, gen blesi kolektif, gen kesyon sou idantite, sou enjistis, sou lanmou, sou trayizon, sou listwa ak espwa. Yon pawòl vivan e lib.
Je suis un Haytien conscient, libre et fier. Porté par l’amour profond de ma terre sacrée, je refuse d’accepter la fatalité. Je crois que Hayti est un peuple grand, digne, souverain — digne de sa mémoire et de son avenir.Mais pour faire renaître Hayti réellement, il faut d’abord reconstruire l’Homme haytien :un homme affermi dans sa dignité, éclairé par l’éducation, ancré dans la justice, et animé par l’amour de la patrie.
Hayti peut, et doit, renaître.
